jab koi young hota hai

Physics kahta hai har astitva taraNg hota hai,

ye pata to tab chalta hai jab koi young hota hai.

blood mein hemoglobin aur pattiyoN meiN chlorophyll,

masterji theek hai, kaaran haiN raNg ke,

without litmus test, humko batao tum,

chehra kissi gori ka kyuN laal raNg hota hai.

ye pata to tab chalta hai jab koi young hota hai.

Interference hoga, spectrum naya milega,

ye dil bagair prism satraNg sa khilega,

chumbak ka khel saara humko pasaNd hai,

sir aapki umar meiN ab kon daNg hota hai,

ye pata to tab chalta hai jab koi young hota hai.

frequency tere dil ki dil se mere milegi,

resonance hoga, ik peak bhi milegi,

fir ishq ye hamara oochaiyaaN chaDega,

na frequency natural ho to, dil khaNd-khaNd hota hai

ye pata to tab chalta hai jab koi young hota hai.

north-south milne se behta current hai,

masterji theek hai, ye baat hai purani,

ye peedhhi nayi-naveli, badle haiN isne dhhaNg,

same pole ho kar bhi flow current hota hai,

ye pata to tab chalta hai jab koi young hota hai.

physics kahta hai har astitva tarang hota hai

ye pata to tab chalta hai jab koi young hota hai.

Nidhish Tripathi

Ishq meiN ladki

Kuch chahakati kuch mahakati si chali hai

Ishq mein ladki bahakati si chali hai

Kuch to poochho, kuch kaho, aawaaz do,

Khilkhilaane ka bahaana chaahti hai.

aur apne ko sajaana chaahti hai.

Koi laT fir apne gaaloN par gira kar

ChaaNd ko fir ek badali mein chhipa kar

aaiine ko bhi lajaana chaahti hai

aur apne ko sajaana chaahti hai.

aNg se bahane laga hai geet ab to

mil gaya hai usko jeevan-meet ab to

baaNdh ke choonar meiN apni raNg saare

titliyoN ko bhi haraana chaahti hai.

aur apne ko sajaana chaahti hai.

Bewaqt aur bin baat koi haNs paDegi

aur takiye se kabhi barbas laDegi

ho gayi aankhoN se baateiN ab shuru

ab zubaaN se kya chhipana chaahti hai.

aur apne ko sajaana chaahti hai.

Kuch chahakati kuch mahakati si chali hai

Ishq mein ladki bakahati se chali hai

Kuch to poocho, kuch kaho, aawaaz do,

Khilkhilaane ka bahaana chaahti hai.

aur apne ko sajaana chaahti hai.

Nidhish Tripathi